Бишкекте айтылуу спорт ишмери, СССРдин спорт чебери, КР эмгек сиңирген машыктыруучусу, дене тарбия жана спорттун отличниги Адылкан Бекболотовдун жаркын элесине арналган спорттук иш-чара салтанаттуу ачылды. Аны Бишкек шаарынын мэриясынын Дене тарбия жана спорт, туризм жана жаштар менен иштөө боюнча департаментинин колдоосу менен Аскар Бекболотов жетектеген Адылкан Бекболотов атындагы боксту өнүктүрүү фонду уюштурду. 

Мелдеш "Газпром" ден соолукту чыңдоо комплексинде 2010-2011-жылы туулган бокс сүйүүчүлөр арасында 30-майга чейин уланат. 

Иш-чарага спорт ишмерлери, ардагерлери, федерациялардын жетекчилери, белгилүү спортчулар, мамлекеттик мекемелердин өкүлдөрү жана спорт сүйүүчүлөр катышты. Алар кыргызга эмгеги сиңген машыктыруучу Адылкан Бекболотовду эскерип, жасап кеткен иштерин даңазалашты. 

Ал эми кыргыз спортун өнүктүрүүгө салым кошкондор сыйланды.