"Бүткүл дүйнөлүк тазалык күнүнө" карата "Келгиле, аткарабыз!" кыймылы 2008-жылы Эстонияда пайда болгон. Анда 50 миң активист өлкөнү 5 саатта 10 миң тонна таштандыдан тазалаган. Бул акция дүйнө жүзү боюнча экологиялык долбоорлордун жана жарандык демилгелердин башталышына түрткү болгон.

Биринчи дүйнөлүк тазалык күнү 2018 -жылдын 15-сентябрында уюштурулган. 2019-жылы планеталык ишембиликте 180 өлкөдөн 21,2 миллион катышуучу бириккен. 2020 -жылы глобалдык пандемия себеп болгон чектөөлөргө карабастан, глобалдык акцияга 11 миллион адам катышкан.

Кыргызстанда бул акция быйыл алтынчы ирет уюштурулат. Аны “Эко Деми” фондунун негиздөөчүсү жана президенти Айжан Чыныбаева командасы менен колго алып, кыска аралыкта ишембиликтин масштабын мамлекеттик деңгээлге жеткире алды. Иш-чарага өлкө башчылары, өкмөт өкүлдөрү, мамлекеттик жана муниципалдык ишканалардын кызматкерлери, жеке сектордун өкүлдөрү жана ыктыярчылар тобу активдүү катышып келет.

Иш-чаранын максаты – экологиялык абалга, коомдук жайлардагы тазалыкты сактоого, жаратылышы ресурстарын аң-сезимдүү пайдаланууга, үнөмдөөчү технологияларды пайдаланууга жана таштандыны туура иштетүүгө көңүл бурдуруу.

"Эко Деми" коомдук фонду республиканын шаарларындагы жана аймактарындагы булганыч аймактардын виртуалдык картасын иштеп чыккан.

Ар бир каалаган адам акциянын катышуучусу боло алат, жарандар өз турак-жайларынын аймагын, парктарды жана эс алуу жайларын тазалоого катыша алат.

2019-жылы өткөрүлгөн ишембиликтин натыйжасында, Кыргызстан дүйнөлүк акциянын жыйынтыктары боюнча биринчи орунду ээлеген.